Sir Gawain and the Green Knight pg. 32
Tyffen her takles, trussen her males,
Richen hem þe rychest, to ryde alle arayde,
Lepen vp ly3tly, lachen her brydeles,
Vche wy3e on his way þer hym wel lyked.
Þe leue lorde of þe londe watz not þe last
Arayed for þe rydyng, with renkkez ful mony;
Ete a sop hastyly, when he hade herde masse,
With bugle to bent-felde he buskez bylyue.
By þat any dayly3t lemed vpon erþe
He with his haþeles on hy3e horsses weren.
Þenne þise cacheres þat couþe cowpled hor houndez,
Vnclosed þe kenel dore and calde hem þeroute,
Blwe bygly in buglez þre bare mote;
Braches bayed þerfore and breme noyse maked;
And þay chastysed and charred on chasyng þat went,
A hundreth of hunteres, as I haf herde telle,
of þe best.
To trystors vewters 3od,
Couples huntes of kest;
Þer ros for blastez gode
Gret rurd in þat forest.
At þe fyrst quethe of þe quest quaked þe wylde;
Der drof in þe dale, doted for drede,
Hi3ed to þe hy3e, bot heterly þay were
Restayed with þe stablye, þat stoutly ascryed.
Þay let þe herttez haf þe gate, with þe hy3e hedes,
Þe breme bukkez also with hor brode paumez;
For þe fre lorde hade defende in fermysoun tyme
Þat þer schulde no mon meue to þe male dere.
Þe hindez were halden in with hay! and war!
Þe does dryuen with gret dyn to þe depe sladez;
Þer my3t mon se, as þay slypte, slentyng of arwes --
At vche wende vnder wande wapped a flone --
Þat bigly bote on þe broun with ful brode hedez.
What! þay brayen, and bleden, bi bonkkez þay de3en,
And ay rachches in a res radly hem fol3es,
Hunterez wyth hy3e horne hasted hem after
Wyth such a crakkande kry as klyffes haden brusten.